標題: 泛民191萬修訂反剪布 [打印本頁]
葉國謙剪布議案
為咗阻遏泛民「拉布」，民建聯葉國謙早前喺財委會提出限制議員提修訂次數議案，話若果成功，就可避免「長毛」梁國雄喺長者生活津貼撥款拉布事件發生。但泛民話明奉陪到底阻止剪布，並就剪布議案聯手創作近191萬項修訂，應該係史上最多嘅修訂。立法會秘書處就叫苦，話就算議員肯用最快速時間審議表決，都要用1989日，即係5年半時間先至有可能審完，即係用晒4年任期都搞唔掂。
全部審完要5年半
財委會今日又開會，續審議阿謙早前提出嘅剪布議案。秘書處向議員提交文件，話依家遇到問題唔知點搞，因為暫時收到1,909,283項修正案，職員就算每項用2分鐘整理檢視，若用1名職員計，都要408個月時間。將文件放上網供公眾參閱，都要2至3個禮拜時間。
就算加人手加班，議員有無本事審議呢？秘書處話，如按正常程序1.5分鐘按一下表決掣，至少都開1989日或者2,3868節會議（每節2小時）。睇番文件，泛民以23人聯名提嘅修訂佔最多，有184.9萬條，以個人計，陳志全就提咗約2.4萬條。
葉：至少用幾百萬公帑
阿謙就話唔會被泛民嚇倒喎，亦唔會撤回佢嘅剪布議案。對於被泛民「妖魔化」，佢不以為然，仲話今次反而被市民睇到，泛民點樣浪費納稅人嘅錢，因為秘書處要用大量人手處理，至少幾百萬公帑。佢同Emily講，自己只係想議會可以運作，唔會成日被人拉布，又話佢自己都有讓步，由最初提出只限1議員1議案提1條修訂，家已經肯同泛民傾，但佢話有泛民提出，畀議員提1000條修訂，咁即係玩嘢喎。
明報
擺明玩野!