標題: 翁靜晶：憲法科攞C失望 [打印本頁]
香港大學法律學院副教授戴耀廷因為發起「佔領中環」成為大紅人，原來佢曾經教過翁靜晶。噚日翁靜晶喺facebook話，自己喺港大受教於戴教授、Carol Peterson同陳文敏，但暗指其中一個老師，疑因學生同自己立場不同而畀佢低分。
Emily噚晚問戴教授，佢話無印象憲法科有無教過翁靜晶，但翁讀碩士時，佢記得教過翁《基本法》，但唔記得翁嘅成績係點，又話改卷時學生只係寫學生證號碼，老師唔會知道學生身分。佢話，以佢所知，港大法律學院嘅老師，唔會因為同學嘅政見立場影響評分，認為翁靜晶咁講，只係從學生嘅角度出發，但並非事實。
睇番翁靜晶嘅版本，佢話當年憲法科令佢好失望，因為當時老師對學生話，「鼓勵不同角度，不同聲音，只要有足夠論證和法律基礎支持，縱使學生的政見與老師不同，亦不會影響分數」。翁喺模擬考試中，寫出當年對「人權法」嘅論點，力數英國人嘅偽民主云云，結果模擬考試成績佢得「C」。
戴耀廷：無印象有冇教過佢
翁又話，有同學解釋，「你錯在與老師的看法不同······識時務者為俊傑，正式考試，好自為之」。喺正式考試時，翁話用咗同模擬考試一模一樣嘅憲法論證同基礎，但改變了立場，「變成讚美英國而狠批中國」，最後佢得到A，仲話收到老師嘅來電祝賀。戴耀廷就話，佢從來唔會打電話恭賀學生，唔知翁靜晶講緊係邊一個。
明報