【明報專訊】當反對佔領中環運動嘅「幫港出聲」積極運作之際，佔中行動亦加強組織工作，除咗佔中三子，仲啱啱搵到公民黨陳淑莊Tanya加入，成為佔中後援會召集人，Tanya會幫手聯繫及支援支持佔中嘅民間組織。Tanya幫佔中做義工，重任之一係協助籌備12月舉行嘅第二次佔中商討日大型集會。
另一邊廂，民主黨立法會議員黃碧雲近日去咗加拿大多倫多搞香港普選座談會，談佔中理念。
碧雲話當日有數十人包括「港加聯」成員出席，佢主要匯報香港政治形勢同佔中理念，現場有兩個港人移民舉手話要參加佔中，有啲就話做加拿大支持佔中後援會。見到咁嘅反應，「港加聯」話會安排佔中三子之一戴耀廷9月中與當地華人視像對話，有乜唔明到時可以問清楚。
佔中嘅對家組織「幫港出聲」勝在有錢，今日再喺報章賣第二次反佔中廣告（刊A9），佢哋除咗facebook，仲用埋WhatsApp收集支持者，叫人加入或邀請朋友加入群組。佢哋又喺fb玩有獎問答遊戲，答中問題嘅fans有機會同發起人之一周融「飯敘」！
周融就話其實只係想透過飯敘接觸市民，聽下市民睇法，又話佢哋之前籌到100萬元，足夠賣兩次報章廣告。「香江智匯」今午3點半喺銅鑼灣世貿中心38樓搞「佔領中環vs幫港出聲——正邪之爭？」論壇，屆時又會有周融同埋戴耀廷針鋒相對。