標題: 論佔中 林行止鄭赤琰筆戰 [打印本頁]
關於「佔中」討論嘅火藥味蔓延到兩位前輩級人馬林行止同鄭赤琰身上，事緣《信報》創辦人林行止撰文話，反佔中團體「幫港出聲」係「打手」，引發佢同「出聲」發起人之一、中大政治系前主任鄭赤琰嘅筆戰。
為「打手」批評過招
林行止今個月13號喺《信報》發表〈正邪蛙噪亂視聽 眾情激盪難太平〉文章，質疑幫港出聲只出聲而唔論政，係「意識層次很低的『打手』工作」。同時，佢提到唔明點解鄭赤琰甘願做「『打手』般的急先鋒」。
鄭赤琰喺23號發表文章反擊，話幫港出聲唔單止為「佔中」事出聲，今後遇到有人喺重大議題入面誤導市民視聽時，都會用學術論證嘅態度去出聲，「要沉默多數出聲是個大學問，不是無見識的『打手』行為」。林行止噚日再刊文章，話無意研究幫港出聲嘅真身係咪打手，不過就覺得佢哋嘅出現「確實予人以不堪的印象」。
另外，Emily噚日話，中國問題評論員林和立前日接受劉慧卿訪問時，雙方談及有人喺香港搞陰謀論，其實係講緊美國喺香港發動「顏色革命」嘅陰謀，而唔係指「習近平打算喺香港搞文革式批鬥」。
明報