【明報專訊】反對佔中嘅「幫港出聲」，成立咗短短1個月，今日已喺報章第四次賣廣告，認真有財力。佢哋今次嘅廣告唔止針對佔中，廣告對象仲話係畀泛民政黨嘅支持者，叫佢哋投票畀政黨時真係要諗清楚；仲要問吓泛民政黨，佢哋點樣保證佔中發生時會和平無事？
「幫港出聲」今次擺明要拉政黨落水，支持佔中嘅民主黨副主席羅健熙就話，預咗對方會「搞」泛民政黨。佢話好疑惑，因為「幫港出聲」口口聲聲話都支持普選，但又提唔到有乜嘢方法可以做到，人哋無辦法之下搞佔中，「幫港出聲」又喺度批評人，都唔知佢哋想點。羅健熙又話對方真係好勁，一個月登4次廣告，勁過政黨搞選舉宣傳，論財力，泛民政黨真係無對方咁有米。