公民黨諷民建聯出賣市民

morris_2007

「真誠出賣您」

【明報專訊】將軍澳堆填區擴建問題爭議好大，唔少政黨近日想以群眾壓力令議員反對擴建。公民黨日前就喺街上派發單張，不過上面唔係講佢哋嘅立場，而係印咗民建聯主席譚耀宗、西貢區議員陳國旗個樣，同埋民建聯西貢支部嘅聯絡電話電郵。點解會幫人宣傳？睇真啲，單張下面印有「真誠出賣您」嘅字句，擺明係改民建聯嘅「真誠為香港」口號，諷刺佢哋咁話。


單張批民記堆填議題出賣居民

呢張單張引述有報章寫民建聯將會支持堆填區擴建，但又引述陳國旗一句「真實對白」：「富藍（選區）平均呎價貴過日出康城個（嗰）邊千幾兩千蚊，有冇諗過點解？阿媽教我做人唔應該咁自私！」


公民黨楊岳橋話，佢哋呢句真實對白係來自一個電視台報道，印呢張單張，係希望市民可以透過單張上嘅聯絡方法向民建聯施壓咁話；雖然周日開始派，但居民好踴躍，一日已經派咗過千張。至於「真誠出賣您」一句，佢話都係抽民建聯水，因為民建聯喺堆填區議題上出賣居民咁講。


民記陳國旗：公民黨慣咗抹黑

陳國旗對事件比較淡然，回應話公民黨「慣咗抹黑對手」，佢承認有講過上述說話，但就話自己講嘅時候係有前言後語，批評公民黨斷章取義喎。

http://news.sina.com.hk/news/20130625/-3-3000096/1.html

事實上堆填區係會影響樓價.